Er virkilega hægt að gera upp hug sinn svo snemma?

Aðild að Evrópusambandinu er ekki einföld og sjálfsögð.  Við vitum t.a.m. ekki hvaða áhrif það mun hafa á veiðiréttindi okkar umhverfis landið sem tók okkur langan tíma og mikla vinnu að öðlast.  Það sem fólk virðist vera að hrópa á með þessu er aukinn fjárhagslegur stöðugleiki og lægri vextir en ekki endilega aðildin sem slík.  Það er nefnilega ýmislegt annað sem fylgir aðild af þessu tagi.  Það mun hins vegar ekki verða lýðum ljóst fyrr en umræður vegna aðildar hefjast og fer það þá alfarið eftir upplýsingaflæðinu á meðan á því ferli stendur hvað hinn almenni borgari veit í raun og fær að hafa áhrif á um útkomuna.  Það er því ómögulegt að fólk átti sig á því í raun hvað í slíkri aðild felst fyrir svo litla þjóð eins og okkur, sem hefur miklum hagsmunum að gæta í sérstöðu sinni í heiminum.

Með þessu er ég alls ekki að mæla á móti slíkri aðild.  Heldur er ég ekki að hrópa eftir slíkri aðild.  Þá skoðun vil ég mynda mér þegar aðildarskilmálar hafa verið settir fram og hvað verður í húfi.

Við verðum líka að átta okkur á því að 75% allra skulda fyrirtækja á Íslandi er í erlendri mynt og að skiptigengi yfir í annan gjaldmiðil mun aldrei verða jafn hagstætt og gengi íslensku krónunnar var þegar að lánin voru tekin.  Það þýðir varanlega hækkun á höfuðstól umræddra lána í hlutfalli við mismun gengis við lántöku og skiptigengis.  Það sama á að sjálfsögðu einnig við um lán einstaklinga í erlendri mynt.  

Meirihluti styður ESB-aðild

Athugasemdir

[Haraldur Hansson, 20.11.2008 kl. 00:50]

Svarið fyrir spurningunni/fyrirsögninni er: Nei, það er ekki hægt. Og þá gildir einu hvort menn eru fylgjandi eða andvígir í augnablikinu.

Það vantar mjög mikið upp á að almenningur hafi hlutlausar upplýsingar um hvað ESB er og hvað innganga þýðir. Ég setti saman smá blogg um Maastricht á mannamáli um daginn, einmitt um þetta.

[Fannar frá Rifi, 20.11.2008 kl. 01:06]

Meðan Rómarsáttmálin er gildi þá förum við annað hvort inn eða tökum ekki þátt. og það þýðir að við verðum með í sjávarútvegsstefnunni eða að við stöndum fyrir utan sambandið.

þetta er ekki einhver bíla parta sala þar sem þú velur þér hvað þú vilt í bílinn þinn. þetta er bíla sala sem selur eina tegund af bílum. það eina sem þú getur valið er hvort að setjir 16 tommu eða 17 dekk undir.